Cul prin lusôr dai 7 di Mai dal 1976 si impâr ce che al è restât dal Friûl dopo dal fisc dal taramot.

Muarts e ruvinis pardut. Si dan daûr lis vôs sgardufadis cui nons di cui che no si lu cjate, di cui che al è vîf, di cui che al à la vite picjade par un fîl. Ore par ore la situazion e mude in maniere dramatiche. Il Friûl al è fat di piçulis comunitâts, dulà che i rapuarts umans a son strents. Chei restâts sot des maseriis a son parincj, amîs, confinants. Ogni famee e fâs une stime des sôs pierditis umanis e materiâls. Il dolôr al lasse inclapîts e al è di ducj. La tiere e treme cence padìn. E va indenant cussì par zornadis e zornadis. Il sbaldiment al brinche par colpe di ce che al è capitât e pe impotence denant de nature.

Tai ospedâi l’ativitât e je frenetiche. Il personâl sanitari al trasferìs di un continuo i ricoverâts dai ospedâi pericolants in altris plui sigûrs, dulà che i ferîts a vegnin curâts cence recuie, cundut che lis scossis a van indenant saldo. Al è faturôs rivâ tes zonis fiscadis. La rêt telefoniche e je inutilizabil di plante fûr. Ancje i sistemis di trasmission militâr a son danegjâts. I radioamadôrs si metin a disposizion des istituzions, inmaneant puints radio che a permetin di vê un cuadri plui precîs de situazion.

Tes zonis taramotadis a rivin dongje de Italie centrâl e setentrionâl lis colonis dai Vigjii dal Fûc par puartâ i prins socors. Cundut che a son stadis vitimis ancje framieç dai militârs e che pe plui part lis casermis a son danegjadis o sdrumadis, i reparts stanziâts in regjon a puartin ae popolazion i prins aiûts providenziâi. Tai socors a son impegnâts ducj i cuarps dal Stât, i Servizis Sanitaris, i Ents e lis Aministrazions statâls. Une sdrume di int e cor dongje di ogni bande par puartâ jutori: oms des istituzions e volontaris unîts tal stes sens di solidarietât, che ju sburte a dâ il miôr di se.

I lûcs dal disastri a vegnin batûts dai corispondents des televisions e dai gjornâi. A restin scaturîts a viodi chel spieli. Ogni tierç moment a contin la tragjedie che e à pocât cuintri cheste tiere. A restin straneâts tal viodi il compuartament dignitôs de int furlane. A metin in evidence la straordenarie fuarce morâl, la tenacitât e la ustinazion, la volontât di tornâ a ricostruî dal moment ce che al jere stât fiscât, ancje a cost di fâlu “di bessôi”.

Za te matinade dai 7 di Mai il President dal Consei dai Ministris, on. Aldo Moro, e il Ministri dal Interni, on. Francesco Cossiga, a visitin lis zonis plui colpidis. Tal dopomisdì al rive il President de Republiche, on. Giovanni Leone, che tal Palaç de Provincie di Udin si incuintre cui Sindics e lis Autoritâts regjonâls. Nancje vincjecuatri oris dopo de scosse si insedie a Udin il Comissari Straordenari dal Guvier, on. Giueppe Zamberletti, che al coordene dutis lis fuarcis presintis in zone. A vegnin metûts sù di buride nûf Centris Operatîfs di Setôr te aree taramotade. Ognidun al ospite une vere unitât di crisi che e fâs di riferiment pai Sindics che si cjatin a frontâ e risolvi dutis lis criticitâts.

Si capìs che il Friûl nol è bessôl.